Жамбыл облыстық ЖИТС-тың алдын алу және оған қарсы күрес жүргізу орталығының психолог мамандары Г. Шамурзаева мен М. Бегманова «ҚТЖ – Жүк тасымалы» ЖШС филиалы – «ЖТ Жамбыл бөлімшесі» Жамбыл пайдалану локомотив депосының қызметкерлеріне АИТВ инфекциясының алдын алу тақырыбында ақпараттық-түсіндіру семинарын өткізді.
Іс-шараның негізгі мақсаты – АИТВ инфекциясы туралы тұрғындардың білім деңгейін арттыру, жұқпаның берілу жолдары, алдын алу шаралары және стигма мен кемсітушілікті алдын алу бойынша түсіндіру жұмыстарын жүргізу болды.
Семинарға 250-ге жуық қызметкер қатысты. Қатысушыларға АИТВ/ЖИТС-тың таралу жолдары, қорғану әдістері, инфекцияның ағзаға әсері, сондай-ақ ерте анықтау мен емделудің маңыздылығы туралы жан-жақты ақпарат берілді. Психолог мамандар салауатты өмір салтын ұстанудың, жұқпадан қорғану мәдениетін қалыптастырудың маңыздылығына тоқталды.
Сонымен қатар, қатысушыларға тақырыптық ақпараттық бүктемелер таратылды.